O Museo Provincial do Mar de San Cibrao acollerá o vindeiro sábado 21 de xuño o XVII Encontro de Embarcacións Tradicionais de Galicia. A Federación Galega pola Cultura Marítima e Fluvial, Culturmar, será a encargada de realizar a presentación ademais do “convite á participación do tecido asociativo cultural da Mariña no Encontro para achegalo a outros colectivos que no pasado se interesaron polas embarcacións tradicionais e agora son axentes da salvagarda das mesmas“. O Encontro de Embarcacións Tradicionais de Galicia celebrarase en Ribeira o vinceiro mes de xullo.
Desde Culturmar “queremos convidar a través deste acto á participación dunha delegación do tecido asociativo cultural da Mariña no Encontro, navegando con nós e coñecendo as actividades de dinamización da colectividade que conformamos Culturmar”. O convite á participación de entidades mariñás no encontro de Ribeira “busca ser un paso máis para a dinamización das embarcacións tradicionais na comarca”.
Culturmar ten fonda representación por toda a costa galega, onde suma unha boa cantidade de embarcacións salvagardadas polos colectivos que a conforman, a través do seu mantemento e a súa dinamización. “É unha realidade, que a preservación e uso de embarcacións tradicionais dende o Arco Ártabro ata a nosa costa Cantábrica é moito menor que nas costas galegas do sur”.
Participaran no acto: Pepe Sacau (presidente de Culturmar), Belén Vidal (Asociación Mar de Muros), Francisco Fra (Asteleiros Fra) e Dane García (Escola de Navegación Tradicional Dorna)