A Xunta de Persoal do Hospital da Costa convocou unha xuntanza este martes para reunir a todos e todas as profesionais do centro hospitalario. A idea era debatiren propostas que lles permitan presentar as súas demandas á dirección, xerencia e Consellería de Sanidade debido á falta de persoal necesario para a atención dos e das pacientes que asisten ao centro hospitalario de Burela.

Durante o encontro dos e das profesionais enumeraron as carencias en diferente áreas de atención como laboratorio, anatomía patolóxica,medicina interna, uroloxia, cardioloxía e outras especialidades.

Outro tema foi a necesidade de presentaren as súas peticións diante da dirección hospitalaria, da xerencia Lugo-A Mariña-Monforte e, por último, da Consellería de Sanidade. Arredor deste punto houbo un debate sobre como facer efectivo este punto.

A conclusión é que polo de agora seguirán as concentracións diante do Hospital, mais irase creando un cronograma de accións destinadas a chamar a atención das autoridades sanitarias. Ditos movementos realizaranse de menos a máis no caso de non atendérense as súas demandas de diálogo.