A deputada socialita Lara Méndez denuncia que os profesionais do hospital da Mariña alertan de que o centro “nunca estivera en peor situación” nos seus 36 anos de historia.
No pleno do Parlamento, o conselleiro de Sanidade, Antonio Gómez Caamaño, esgrimiu en resposta un incremento do 4,3% da actividade cirúrxica en 2024, con preto de 5.400 operacións realizadas no hospital da Mariña, á vez que defende que se rexistrou unha espera media de 45,9 días para acceder a unha cirurxía, 21 días por baixo da media galega e 82 días menos que o estatal.
Méndez lembroulle a recente manifestación multitudinaria en Viveiro en defensa da sanidade pública mentres os seus compañeiros do PP “estaban a facer un Mazón”, “de papatoria”, “no canto de estar cos veciños”. Tamén censurou os datos “maquillados” que ofrece a Xunta, cando hai esperas de “ata dous anos” para ter citas, unhas “cifras insoportables”.
En cambio, o conselleiro criticou a “os axitadores de sempre” que “só buscan alarmar”. Apunta que se ofertan máis dunha vintena de prazas de especialistas para o hospital da Mariña, que son “procesos longos”.
Caamaño agrega que as obras das fases 0 e 1 do plan Director xa están executadas por importe de 20 millóns, ademais de que se comprará novo equipamento e continuarase coa ampliación de servizos.
PLANS LOCAIS DE SAÚDE
Por outra banda, en resposta ao PPdeG, Caamaño informou de que os plans locais de saúde impulsaron un incremento de case o 14% da atención domiciliaria a pacientes inmobilizados, con 189.000 visitas en 2024.
Na actualidade, 95 servizos de atención primaria contan cun plan local de saúde, o que supón o 65% do total. Sanidade prevé chegar ao 100% en 2026