A Xunta de Galicia investirá un total de 23.000 euros nunha nova campaña da intervención integral que se efectúa no galeón San Giacomo dei Galizia, en Ribadeo, desde ano 2018.

Nun comunicado, a consellería de Cultura indicou que nesta ocasión está previsto levar a cabo, durante tres semanas, unha intervención arqueolóxica no costado de babor co obxectivo de obter unha visión transversal e avanzar no coñecemento da arquitectura naval da Coroa Española e dos grandes buques militares dese momento.

O pecio de San Giacomo é un dos grandes xacementos localizados ata o momento da súa época e, estes últimos anos, está a achegar unha importante información arqueolóxica sobre a construción naval da Coroa do século XVI. Neste sentido, a Xunta lembrou que foron moi poucas as ocasións nas que se puideron estudar embarcacións españolas da época, e nunca no estado de conservación e da categoría deste buque.

TESTEMUÑA DA EXPANSIÓN MARÍTIMA DOS EUROPEOS

O departamento que dirixe Román Rodríguez destacou que comprender este proceso é de capital transcendencia no estudo da historia naval mundial, pois será a partir dos avances na arquitectura naval hispano-portuguesa do século XVI cando se produza a expansión marítima.

O equipo técnico que participa nesta campaña confórmano profesores universitarios e investigadores de prestixiosas institucións científicas internacionais como o CSIC, a Universidade de Valencia, a University of Texas, a University of Wales Trinity Saint David e laNewport Ship, que contan cunha dilatada experiencia na xestión de proxectos de arqueoloxía subacuática. Tamén colabora a Armada española.

RESULTADOS DA ANTERIOR CAMPAÑA

As campañas desenvolvidas nos anos 2018 e 2019 pola Consellería de Cultura, Educación e Universidades consistiron na realización de sondaxes arqueolóxicas para caracterizar o pecio. Nestes labores concluíuse a existencia dunha gran cantidade de madeira estrutural cun extracto arqueoloxicamente fértil e que conserva, no seu interior, numerosos elementos de interese patrimonial e cuxa potencia se estima moi importante.

Ademais, recuperáronse algún dos obxectos e xeoreferenciouse e caracterizouse un pecio próximo, situado ao noroeste do galeón.