As covas do Rei Cintolo alcanzaron o pasado martes as 12.000 visitas desde que comezaron os accesos guiados á cavidade, no 2006. O goberno de Mondoñedo asegura que neste 2018 “estanse a superar todas as cifras rexistradas nos anos anteriores”, e resalta que no que vai de exercicio xa se incrementou “nun 2% os datos de peche de campaña no 2017”.

Así, no pasado agosto, o aumento de visitantes con respecto ao mesmo período do ano anterior foi do 35%. Na primeira quincena de setembro, o incremento foi máis lixeiro, dun 5%, fronte ás cifras de visitas do mesmo mes no 2017.

A alcaldesa de Mondoñedo, a popular Elena Candia, entregou un diploma á visitante 12.000 do monumento natural, Lidia Riobó, ademais de agasallala cunha visita gratuíta.

Visitas á Cova do Rei Cintolo

Pode visitar a cova calquera persoa maior de doce anos. Informan na oficina de turismo ou no teléfono 982.50.71.77. O prezo da visita, con hora e cuarto de duración, é de 15 euros, con equipamento incluído.

Ata finais de setembro poderase visitar a cavidade de luns a domingo en grupos reducidos, con tres alternativas: 12.00, 17.00 e 18.30 horas. En outubro o servizo manterase nas fins de semana, pontes e festivos, e desde novembro só haberá visitas no horario matinal e no de primeira hora da tarde.