As asociacións Mariña Patrimonio e Fervenza de Sargadelos, en colaboración co Concello de Cervo, organizan dous roteiros para mostrar o patrimonio arqueolóxico, cultural e natural do municipio. Unha das rutas, que partirá de Rueta e rematará en Sargadelos, será o 30 de setembro e a outra, que comezará en Trasbar para finalizar na Senra, celebrarase o 27 de outubro.

ITINERARIOS

O primeiro roteiro será matinal. Iniciarase cunha interpretación do castro de Rueta, para despois coller o sendeiro que vai desde a praia pola beira do río Xunco. Neste treito, os participantes poderán ver varios muíños. A actividade acabará no conxunto histórico-artístico de Sargadelos.

A segunda das andainas durará toda a xornada. Partirá da fraga de Trasbar, un bosque de grande diversidade ecolóxica e medioambiental, no que se atopan restos de carboeiras. A camiñada continuará polos Montes dos Cabaleiros, que permiten unha vista panorámica da bisbarra, para rematar noutro xacemento arqueolóxico, o castro da Senra.

INSCRICIÓNS

As persoas interesadas en participar na ruta do 30 de setembro teñen de prazo para anotarse ata o día 26. No caso do roteiro do 27 de outubro, a data límite para inscribirse é o 23 dese mes.

Cada actividade custa cinco euros, un prezo que inclúe seguro e desprazamentos en autobús. Anotan nos correos electrónicos fervenzadesargadelos@gmail.com e mr.patrimonio@gmail.com.