O Concello de Mondoñedo anunciou a través dun comunicado de prensa que o propietario dos edificios dos números 13 e 15 da rúa Bispo Sarmiento de Mondoñedo, en estado de abandono, iniciou o proceso para a rehabilitación dos edificios.

Segundo expuxo o goberno local, que en xaneiro do ano pasado inscribiu o inmoble número 13 no rexistro de solares e quitouno a subasta tras multar en dúas ocasións á entidade bancaria propietaria por non acometer tarefas de rehabilitación, técnicos de turismo visitaron Mondoñedo para asesorar ao novo propietario dos mencionados edificios.

O goberno municipal de Mondoñedo destaca que a posta en marcha desta iniciativa é “positiva desde distintos puntos de vista. Un deles, porque os inmobles en mal estado, como é o caso destes, son un perigo potencial para a seguridade das persoas. É importante igualmente porque os edificios moi deteriorados afean a paisaxe urbana e non axudan para nada, antes ao contrario, a potenciar a imaxe da cidade”, expoñen desde o executivo, que considera que a reforma “é unha demostración máis de que investir no municipio é interesante”.