A Asociación para a Defensa Ecolóxica de Galiza (Adega) e Mariña Patrimonio denunciaron no Servizo de Protección da Natureza (Seprona) que se está a utilizar o Castro da Punta de San Pedro de Benquerencia como aparcadoiro de autocaravanas. Trátase dun xacemento non excavado, pero si inventariado pola Dirección Xeral de Patrimonio Cultural.
As dúas agrupacións presentaron unha denuncia polo que entenden como un incumprimento da normativa urbanística. Os colectivos lembran que este xacemento barreirense é un ben patrimonial incluído no catálogo das Normas Subsidiarias de Planeamento do Concello de Barreiros, cunha calificación urbanística de solo non urbanizable e protexido.
“Consideramos que esta protección da que goza o Castro de San Pedro non é compatible co uso que se lle está a dar actualmente como aparcadoiro de caravanas ou lugar de tránsito destes vehículos”, sinala Manuel Miranda, de Mariña Patrimonio.
VULNERABLE
Miranda asegura que “esta práctica pode estar provocando danos no xacemento”, que é especialmente vulnerable porque, “como outros castros costeiros, quizais pola acción do vento, a zona arqueolóxica ten moi pouco espesor. Hai só uns 20 centímetros de profundidade e aprécianse con moita facilidade restos de cerámica. O peso dos vehículos, máis aínda se chove, pode causar un impacto”, expón.
A ZONA ARQUEOLÓXICA DO XACEMENTO É POUCO FONDA, “DUNS 20 CENTÍMETROS”, POLO QUE O PESO DOS VEHÍCULOS O PON EN PERIGO
O dirixente de Mariña Patrimonio argumenta que “se en monumentos naturais como As Catedrais insistimos en que a xente non pase por riba dos arcos, aquí non podemos permitir que se pousen sobre un castro vehículos de moito peso”.
“FINCA PARTICULAR”
O alcalde de Barreiros, o popular Alfonso Fuente Parga, resalta que se trata “dunha finca particular, nunca dun aparcadoiro municipal”, e afirma que “se é certo que iso é prexudicial e non debe pasar é Seprona quen debe actuar”. O rexedor admite que o goberno local non fixo ningunha advertencia aos turistas da presenza dun castro inventariado na zona, nin tampouco ningún aviso ao titular da propiedade.
“se é certo QUE NON SE LLE PODE DAR ESE USO É SEPRONA QUEN DEBE ACTUAR”, ASEGURA O ALCALDE
SÓ OITO PRAZAS NUN REFERENTE TURÍSTICO
O municipio conta cun único aparcadoiro de autocaravanas de oito prazas, situado en San Cosme, que se queda pequeno para un lugar tan atractivo a nivel turístico como Barreiros. “É absolutamente insuficiente para unha modalidade de turismo en auxe coma esta”, expón Fuente Parga.