O centro social Xebra e a asociación Mariña Patrimonio organizan unha visita guiada a Santo Estevo do Ermo, en Barreiros, un enclave de gran relevancia arqueolóxica, histórica e patrimonial na comarca. A iniciativa ten como obxectivo dar a coñecer as escavacións arqueolóxicas realizadas o pasado setembro, intervencións impulsadas por Mariña Patrimonio.

Trátase dunha actividade de balde pensada para todos os públicos.  A xornada, programada xa en decembro mais cancelada debido ás condicións meteorolóxicas, prevé ser un día sen choivas nin tempo adverso. Con todo, recoméndase acudir con roupa e calzado cómodos debido ás características do terreo.

Ademais, a organización informa de que están a coordinar, a través das redes sociais do centro social Xebra, desprazamentos en coche desde Burela e Viveiro para facilitar a asistencia das persoas interesadas.