-Son frecuentes as chegadas de lobos mariños ás nosas costas?
O día 21 de decembro recibimos numerosos avisos. Un deles foi pola chegada dun lobo mariño que chegou a Burela, efectivamente, e tamén doutro que avistaron na zona de Ortigueira-Mañón. O caso de Burela, polas imaxes enviadas, era un cachorro de lobo mariño cinsento, esa é a especie. Son cachorros de dous ou tres meses nada máis. Por que tan novos? Porque esta especie ten os seus partos entre setembro e final de ano. As colonias de cría están polo norte de Europa, sobre todo Francia e Illas Británicas e durante a época de parto nacen milleiros de cachorros desta especie. O lobo mariño cinsento desteta de maneira moi precoz, é dicir, a nai abandona os cachorros ás catro ou cinco semanas para alimentarse, a consecuencia é un número enorme de cachorros esparexidos buscando comida. Esta dispersión máis o feito de ser inverno no mar cos consecuentes temporais e borrascas desvía moitos cachorros ás nosas costas.
-Son cachorros separados das súas mandas?
Esta especie non forma mandas normalmente. Podemos ver varios exemplares pola mesma zona, mais non é unha especie que forme grupos e vaian en común. Xa digo, cando nacen é unha eclosión de cachorros e moitos chegan traídos polas correntes do mar, por tanto, nin sequera dependen deles mesmos.
-Xa dixeches que nacen no Norte de Europa, mais ese é o único hábitat que teñen ou é todo o arco atlántico europeo?
Hai varias especies e as que nos afectan nacen todas no Norte de Europa, Illas Británicas e agora estanse expandindo pola costa atlántica francesa. Porén, é no Norte de Europa onde hai colonias inmensas de lobo mariño cinsento e lobo mariño común. Estas colonias cada vez son máis grandes debido á protección sobre estes animais. Aínda así, non é normal que esta especie chegue tan ao sur, o límite habitual é o sur da costa atlántica francesa, porén, todos os anos ocorre este fenómeno, ver exemplares no Cantábrico.
-Cal é a alimentación destes lobos cinsentos?
É moi variada, desde peixe, cefalópodos, luras ou crustáceos, son cazadoras e por iso teñen unha alimentación moi variada.
-Cal é o procedemento que se segue cando se avista un destes animais e acaba na costa?
Cando chega o inverno, o CEMMA facemos unha serie de campañas de divulgación para explicar á xente como debe actuar. Cando vemos un lobo mariño na praia ao mellor é porque está descansando, cousa moi habitual. Daquela, non debemos achegarnos a un lobo mariño, debemos levar os cans atados pois ultimamente vemos moitos destes cachorros con dentadas de can. Avistado este animal hai que chamar á Rede de Varamentos, ben a través do número da CEMMA ou do 112. Primeiro facemos unha observación, confirmar que especie é, condición corporal e o seu comportamento, pois se está descansando non actuariamos. Se presenta feridas ou condicións físicas moi baixas si actuamos e recolleriámolo para levalo ao noso centro de Nigrán. Aí é onde temos a nosa base para atender estes animais cando están feridos, enfermos ou aplicarlles tratamentos.
-Cales son os remedios que se lles aplican a estas criaturas cando son enviadas ao centro de Nigrán?
Un dos problemas que temos en Galicia é a falta de infraestruturas adaptadas para a recuperación da fauna mariña. Desta maneira, o que facemos é adaptar as instalacións para atender estes lobos mariños de pequeño tamaño ou tartarugas. Faise unha exploración veterinaria para coñecer os problemas que presenta, a partir de aí faise un diagnóstico e logo un tratamento. Este primeiro tratamento faise en Nigrán e logo, se todo vai ben, tamén temos a colaboración do Instituto Galego de Formación de Acuicultura, na Illa de Arousa, que nos facilitan instalacións máis grandes antes de soltalo ao mar.