En 1994, a Ría de Ribadeo foi recoñecida como Humidal de Importancia Internacional, un instrumento de protección que pretende salvagardar as zonas húmidas máis importantes do mundo polo seu valor ecolóxico e para  a conservación da biodiversidade.

O catálogo destaca o último treito da desembocadura do Eo – unha superficie duns 1.700 metros cadrados delimitada pola costa de Ribadeo, Vegadeo e Castropol– como un enclave de especial interese para as aves acuáticas por ser área de invernada ou de refuxio ocasional para medio centenar de especies.

O inverno convértese así na época de maior abundancia de aves, con posibilidade de observar concentracións de asubiadores, patos rabilongos ou cercetas, entre outras especies.

Coincidindo coa celebración do Día Internacional dos Humidais, o 2 de febreiro, ás 15.00 horas, o ornitólogo Enrique Sampedro Miranda, autor do blog Ría de Ribadeo,  guiará unha saída pola ría. A organización recomenda, ademais dos prismáticos, roupa de auga e calzado cómodo.

As persoas interesadas teñen que formalizar a súa reserva no teléfono 982.128.689 ou no e-mail turismo@ribadeo.org.

CONFERENCIA

A xornada iniciarase cunha conferencia de Sampedro Miranda sobre a evolución e o estado do humidal tras 25 anos como espazo protexido, ás 11.30 horas na Casa da Xuventude.

A ficha recollida na lista de Humidais de Importancia Internacional indica que os censos invernais rexistraban entre 5.000 e 10.000 individuos de diferentes especies.

O último censo de aves invernantes realizado e publicado polo ornitólogo ronda os 2.300 individuos.