A alcaldesa de Viveiro, Mariña Gueimunde, anunciou esta mañá, a través dun bando, a eliminación das restricións do consumo de auga da traída, tras a vertedura dun millón de litros de xurro que se orixinou en Muras e contaminou uns 30 quilómetros do río Landro ata a súa desembocadura, na ría de Viveiro o pasado venres.
Segundo explica a mandataria popular, “os resultados analíticos das mostras tomadas tanto nos depósitos como nos distintos puntos da rede de abastecemento municpal cumpren os parámetros técnico-sanitarios establecidos en materia de calidade da auga” polo que se levanta a restrición tras catro días sen poder consumir. Viveiro recupera así a normalidade total aínda que o domingo pola tarde volveu captar auga directamente do río, pero coa prohibición do seu consumo mentres as análises non fosen óptimas.
O venres pola tarde a rotura dunha balsa de xurro, preto dunha explotación agrogandeira de Muras, foi a causa desta vertedura incontrolada, que rapidamente se estendeu ata a súa desembocadura afectando tamén as praias da localidade. Unha vez detectada a vertedura, Viveiro parou a súa captación de auga e durante a fin de semana tomáronse distintas vías para manter o abastecemento, “que sempre estivo garantido”, recalca a alcaldesa. A alcaldesa tivo palabras de agradecemento aos servizos de emerxencias que estiveron a traballar continuamente estes días e que “vixiaron que todo funcionase correctamente”, engadiu.
Por parte da Consellería de Medio Ambiente destacan que estes días participaron máis dunha trintena de persoas en controlar e frear o impacto da vertedura, procedentes de distintos departamentos dependentes da Xunta, como as Consellerías de Medio Ambiente e Cambio Climático –incluído Augas de Galicia–, de Sanidade, do Medio Rural e Mar. A eles engádense tamén profesionais de entidades locais como o propio Concello de Viveiro.
A Xunta insiste en que se está investigando o episodio, o seu impacto e posibles consecuencias e que “se adoptarán as medidas que correspondan desde o punto de vista administrativo –coa posibilidade de abrir expedientes sancionadores se se considera oportuno– unha vez finalicen todos os traballos de campo e se conte coas conclusións sobre este incidente”.