A organización ecoloxista Arco Iris anuncia que iniciou as “accións oportunas” para personarse como “acción popular” no proceso xudicial vinculado coa necesidade de adoptar medidas “inmediatas” para salvagardar o medio ambiente da contorna de Alcoa, en San Cibrao.

“Medio Ambiente ten xa nas súas mans o informe remitido a semana pasada polo Tribunal Superior de Xustiza de Galicia (TSXG), que alerta da necesidade de adoptar medidas inmediatas para salvagardar o medio ambiente da contorna de Alcoa en San Cibrao“.

“A balsa de lodos da compañía ocupa case 90 hectáreas e preto de 50 hectómetros cúbicos e alberga unha auténtica bomba de reloxaría tóxica”, sostén a organización que engade que “se atopa nestes momentos pendente de certas melloras técnicas para subir a cota do muro e prolongar unha agonía ambiental única en España e Europa”.

Os ecoloxistas, que instan á Xunta a pronunciarse, cren que a “intención de Alcoa é prolongar a xeración de lodos e o seu depósito na balsa ata o ano 2035” e denuncian que isto suporía “acabar con toda unha comarca e a vida mariña en moitos quilómetros”.