O Ministerio de Industria convocou a mesa multilateral para abordar a situación de Alcoa San Cibrao para este martes ás 11,00 horas, a través de videoconferencia.

O pasado venres, ministerio, Xunta e comité mantiveron un encontro preparatorio tras o que Industria solicitou á multinacional que explique e detalle o plan industrial para a planta, “garantindo os investimentos e o emprego, incluído o das empresas auxiliares, así como a subministración aos provedores para garantir a carteira de clientes”.

Pola súa banda, o presidente do comité de empresa, José Antonio Zan, situou como “data idónea” este luns día 13, pola “urxencia” da situación, á vez que a Xunta reclamou ao Goberno “que tome a iniciativa” para pedir “a letra pequena” da súa proposta a Alcoa.

A última proposta da compañía implica cesamentos temporais da actividade co compromiso de que non haxa un despedimento colectivo en catro anos. Aos representantes dos traballadores por agora non lles “serve” a proposta, en primeiro lugar, porque os empregados das auxiliares “son igual que os de Alcoa”.