O presidente da Autoridade Portuaria de Ferrol-San Cibrao, Indalecio Seijo, reclamou a Portos do Estado a necesidade de compensar a perda de ingresos provocada por “a abrupta aceleración da transición enerxética” e con ela a “freada” pola perda dos tráficos do carbón para a central térmica de Endesa nas Pontes (A Coruña).
Dita petición realizouna Seijo na mañá deste xoves, 22 de abril, tras manter un encontro e unha reunión de traballo co presidente de Portos do Estado, Francisco Toledo, en Madrid. Na capital do Estado, Indalecio Seijo, trasladou que dito proceso deixou ao Porto de Ferrol, antes do que inicialmente se previu, sen un tráfico anual de aproximadamente 4,5 millóns de toneladas de carbón.
PROXECTOS
Así mesmo, puxo en valor a contribución do organismo que preside ás economías de Ferrolterra e A Mariña. No seu encontro, ademais, Seijo Jordán informou a Toledo dos esforzos iniciados para diversificar tráficos tanto nos peiraos de Ferrol como nos de San Cibrao (estes baixo a concesión de Alcoa ata 2027).
Fíxoo tamén partícipe do grao de execución da obra do tren a Caneliñas e do interese mostrado por varias empresas en desenvolver proxectos nas instalacións da institución, algúns deles vinculados á eólica mariña e o hidróxeno verde.
OBRAS ACCESO FERROVIARIO Ao PORTO EXTERIOR
Nestas circunstancias, segundo detallou a Autoridade Portuaria nun comunicado, “complicouse a tarefa de afrontar o pago da obra do acceso ferroviario ao porto exterior de Ferrol ” e que “sufragala así, e sen axuda externa, podería sumir á Autoridade Portuaria en dificultades financeiras no curto e medio prazo”, advertiu o seu presidente.
A institución leva anos facendo fronte ás devolucións obrigadas do préstamo subscrito co Instituto de Crédito Oficial (ICO) para finalizar as obras do porto exterior e aos créditos recibidos do Ministerio de Industria, no período 2007-2011, para apoiar a reindustrialización da comarca.
AXENCIAS