Trala asemblea de traballadoras que destituíu á sindicalista da Unión Xeral de Traballadores (UXT), Rogelia Mariña, a dirección de Sargadelos comezará a readmitir personal este martes. Segundo fontes da empresa, nesa xornada entrarán a traballar dúas das obreiras despedidas durante o conflito laboral na fábrica de Cervo.

Este luns non houbo despedimentos, tal e como anunciou o conselleiro delegado, Segismundo García, tras coñecer que a votación do cadro de persoal satisfixo a súa intención de revocar a Mariña do seu cargo.

Co xuízo polas demandas da sindicalista e da UXT contra a empresa e contra o propio máximo accionista pendente para o 21 de outubro, semella que a dirección tentará rebaixar a tensión e escenificar que non existe conflito na fábrica unha vez Mariña foi revocada.

Coa acta da asemblea entregada e pendente de aprobación, o que suporá o relevo da sindicalista da UXT por unha delegada de Comisións Obreiras (CC OO), a dirección mantén por agora apartada a Mariña, que continúa -rematadas as súas vacacións- cun permiso retribuído por tempo indefinido.

A UXT DESCARTA NEGOCIAR

A UXT descarta calquera negociación coa empresa e prepara a impugnación da asemblea de traballadoras que destituíu á súa sindicalista. A espera dos movementos da dirección, o sindicato mantén a súa ameaza de levar o conflito á Fiscalía.