A cerámica de Sargadelos retomou a súa actividade o pasado luns con aproximadamente un terzo do persoal, unhas 30 empregadas das arredor de 90 que constituían o persoal da fábrica antes da pandemia do coronavirus, ante a que o grupo empresarial presentou un Expediente de Regulación Temporal de Emprego (Erte) que afectou á practica totalidade das traballadoras das factorías de Cervo e Sada. A intención da empresa é “incorporar xente pouco a pouco” a medida que “o permita a demanda”, coa previsión de reabrir a venda o vindeiro luns, cando tamén se conta con rearrancar a produción no Castro sadense.

Os traballos realizados, polo de agora, consistiron no mantemento para a posta en marcha dos fornos, ademais de tarefas de colado e pintado. A empresa precisa atenter pedidos especiais e realizou un plan de incorporacións semanais que pretende implementar de xeito progresivo, en función da cantidade dos pedidos.

TENDAS

No tocante ás tendas, os espazos da Coruña e Madrid abriron o pasado luns, ao igual que a maioría dos negocios franquiciados, e Cervo e O Castro retomarán en principio a venda a vindeira semana. No caso de Santiago, procúrase outro local tras non chegar a un acordo co dono do anterior establecemento para manter o aluguer, o que posiblemente retrasará a reinauguración máis alá do mes de xullo.

No tocante ao proxecto de museo, a taberna planificada dentro do plan do conxunto museográfico abrirá en verán. Sargadelos tamén está a redeseñar o percorrido das visitas guiadas.

Por outra banda, a lendaria drag queen norteamericana Miss Coco Peru amosou en redes sociais a súa colección de cerámica de Sargadelos.

Pratos, colgantes defensivos ou pezas como a Parella Lendo compoñen a compilación desta icona da cultura gay e drag queen.