Stolt Sea Farm colocou este martes a primeira pedra da súa nova nave de linguados, o edificio RAS II, no municipio lucense de Cervo, un proxecto que conta cunha axuda da Xunta de máis de 13 millóns de euros. A ampliación permitirá incrementar a superficie produtiva en máis de 7.000 metros cadrados e acadar unha capacidade de produción de máis de 400 toneladas anuais. O presidente da Xunta, Alfonso Rueda, asistiu ao acto, onde recoñeceu o “compromiso real” da compañía e o seu “ritmo de crecemento extraordinario”. O titular do Goberno galego puxo en valor que, malia as “orixes afastadas” da norueguesa Stolt Sea Farm, o seu “centro de operacións mundial está en Galicia”.

Tras iniciar o seu discurso cunha mensaxe de pésame polo integrante de Cantigas e Agarimos falecido en Agolada, que traballaba nesta empresa, Rueda destacou que a compañía medra e “crea riqueza”, polo que defendeu que “a acuicultura responsable ten moitísimo futuro”. Acompañado pola conselleira do Mar, Marta Villaverde, e pola alcaldesa de Cervo, Dolores García Caramés, o presidente galego salientou que os directivos de Stolt Sea Farm “sempre insisten moito” en “ser sostibles e mirar ao futuro”, cun modelo que busca combinar a calidade coa innovación e o respecto polo medio ambiente.

CRÍTICAS AO GOBERNO POLA REFORMA DO REGULAMENTO DE COSTAS

Por outra banda, Rueda reiterou as críticas ao Goberno central pola reforma do Regulamento de Costas, ao considerar que o Executivo estatal “parece volver cometer os erros de sempre” e “xerar inseguridades xurídicas”. O presidente da Xunta defendeu que en Galicia hai “investidores fiables que están dispostos a investir” e reivindicou o apoio do Goberno galego e a colaboración público-privada para impulsar proxectos produtivos no territorio. “Faremos todo o posible para que as nosas competencias sexan exercidas sen interferencias por parte do Goberno central, que parece que non quere entender algunhas cousas”, afirmou Rueda.