O presidente do comité de empresa de Alcoa en San Cibrao, José Antonio Zan, destaca que aínda quedan por arrincar 28 cubas das 512 que ten a planta de aluminio situada en Cervo. Segundo sostén, esta situación supón un incumprimento dos acordos asinados pola multinacional sobre o rearranque da fábrica. Zan asegura que as cubas poderían estar xa operativas antes de que rematase o mes de marzo se existise vontade por parte da empresa. “Se quixesen, poderían estar tranquilamente xa antes de que acabase o mes de marzo”, afirmou este mércores, ao tempo que criticou que a decisión depende exclusivamente da multinacional, “que nin segue prazos nin cumpre cos acordos que asinou en tempos”.

Ante esta situación, o representante dos traballadores reclama unha reacción contundente das administracións. En concreto, pide que tanto o Ministerio de Industria como a Xunta de Galicia “dunha vez por todas dean unha puñada na mesa” e deixen de “mirar para outro lado mentres multinacionais fan o que queren cos acordos”.

Zan lembra ademais que foron precisamente estas administracións as que participaron nas mesas de negociación, polo que considera que tamén deben asumir a responsabilidade de vixiar e garantir que se cumpran os compromisos alcanzados. Neste contexto, cualifica de “vergoñento” que tanto o Goberno central como a Xunta “non cumpran nin obriguen cumprir a unha multinacional co que eles mesmos negociaron e acordaron”.