A Xunta advertiu este venres que, nos termos nos que se comunicou, rexeita o Expediente de Regulación Temporal de Emprego (ERTE) que acaba de presentar a dirección da planta de Sargadelos en Cervo, á vez que insta á continuación da actividade “canto antes” en defensa dos dereitos das persoas traballadoras.

Como autoridade laboral, o Goberno galego informou de que aprecia “incongruencia” na solicitude presentada ao non axustarse á normativa aplicable e demanda información e documentación adicional á dirección da empresa. Así mesmo, reafirma que, “como non pode ser doutro xeito”, velará polo cumprimento da lexislación laboral e denunciará calquera ilegalidade que se detecte.

Con respecto ás negociacións levadas a cabo desde abril, insiste en que actuou “desde o primeiro momento con absoluta responsabilidade, mantendo un contacto permanente tanto coa empresa como cos traballadores e Inspección de Traballo, e mediando para que se ofrecese a máxima flexibilidade á dirección –dentro da legalidade vixente– para a realización das obras necesarias para emendar as deficiencias detectadas”.

Como resultado das xestións realizadas polo Goberno galego, Inspección de Traballo concedeu a Sargadelos un prazo suficientemente amplo para acometer as actuacións previstas no requirimento de marzo de 2025 e no de setembro de 2024.

Neste contexto, lembra que Inspección de Traballo realizou unha visita rutineira ás instalacións para comprobar o cumprimento das actuacións solicitadas.

A XUNTA LEMBRA QUE COLABORA EN FINANCIAR AS OBRAS

A Xunta está a colaborar co financiamento das obras, tendo en conta a singularidade da planta, declarada Ben de Interese Cultural desde 2014. Dentro desta colaboración, xa se completaron os estudos sobre as condicións do sistema de ventilación e extracción, así como parte das actuacións esixidas.

Como xa se trasladou en anteriores ocasións, o subsanamiento dos defectos detectados é “perfectamente compatible” co mantemento da actividade e permite, conclúe a Xunta, “garantir a seguridade e saúde do persoal”.

ANA PONTÓN: “A XUNTA DEBE ACTUAR CON CELERIDADE”

A portavoz nacional do BNG, Ana Pontón, pediu á Xunta de Galicia que “non mire cara a outro lado” e actúe coa “máxima celeridade e contundencia” para garantir que a fábrica de Sargadelos en Cervo vai “siga funcionando”.

En declaracións aos medios desde a feira Culturgal, a líder nacionalista aludiu ás últimas decisións tomadas polo dono de Sargadelos, Segismundo García, e situounas como un “risco” para o emprego e a viabilidade da factoría, que considera “un símbolo” do patrimonio cultural de Galicia.

O venres transcendeu que García impuxera un expediente de regulación temporal de emprego (ERTE) a 86 traballadores, dunha duración de 15 días e con inicio o 27 de novembro. Ao mesmo tempo, segundo el mesmo trasladou aos medios, coñeceuse que comunicou ao Xulgado a súa dimisión como CEO.

Neste contexto, Pontón mostrou o seu apoio aos traballadores e traballadores da planta e reclamou o cumprimento dos seus dereitos en materia laboral e de seguridade: “Ninguén se pode crer que está por encima da lei”.