O comité de empresa de Alcoa volve á solicitude dunha intervención pública temporal na planta de Cervo, co obxectivo de que toda a comarca da Mariña deixe de estar “en albas” e “se poida solucionar” a crise que afecta á factoría desde hai anos.
Así o afirmou o presidente do comité, José Antonio Zan, despois de manter unha reunión, este martes, con representantes da comisión de industria do Congreso. Segundo asegura, houbo receptividade, pero “falta a acción do ministerio e Xunta”.
Zan advirte de que “non é unha solución o producir sen viabilidade a futuro”, e iso é o que proporciona, na súa opinión, o forno de cocción e un marco enerxético estable como son as ‘PPA’ –acordos a medio/longo prazo–.
No encontro, segundo explica o presidente do comité de empresa, os representantes dos traballadores expuxeron os termos dos acordos asinados e tamén as dúas sentenzas “que din que Alcoa actuou de mala fe” e “que vén dun proceso da Coruña e Avilés polo cal estivo nos xulgados por presunta estafa, o cal solucionou abonando 70 millóns a ambas as plantas e a todos os traballadores”.
Tamén trasladaron que a ‘joint venture’ “non dá garantía ningunha”. Para iso, ensinaron “toda a documentación sobre Ignis EQT e a propia garantía que dá en 2023 para poder chegar a ser nin sequera valorada polo ministerio como posible comprador”.
Por outra banda, o comité esixe que se faga público o MOU –memorando de entendemento– e ve “moi importante” os parques eólicos “que seguen sen aprobarse” polo Ministerio de Transición.
O PP SINALA FALTA DE COMPROMISOS DA EMPRESA E DO GOBERNO
O PP de Lugo urxiu a convocatoria da mesa de seguimento para dar solucións á planta de Alcoa no San Cibrao despois de que este martes os deputados no Congreso do PP pola provincia –-Francisco Conde, Jaime de Olano e Cristina Abades– recibisen aos membros do Comité de Empresa.
Nun comunicado, o PP de Lugo explicou que os parlamentarios compartiron a “preocupación pola falta de compromisos da empresa e do Goberno central” polo que consideran necesario que se convoque “con urxencia” a mesa de seguimento.
O exconselleiro de Economía e Industria da Xunta Francisco Conde destacou que Alcoa “ten que cumprir cos investimentos comprometidos” do mesmo xeito que o “Goberno do Estado ten que garantir a subministración eléctrica ante o risco dun segundo apagamento”, así como “un prezo eléctrico que poña en igualdade de condicións con respecto aos competidores”. “Pero a realidade é moi distante diso”, lamentou.
Así, indica que na actualidade o Goberno de Sánchez “está a incumprir con todos os compromisos que asumiu na firma do memorando coa Xunta” ao manter un prezo eléctrico “case tres veces máis caro que en Francia e un 40% respecto a Alemaña”.
A estes “agravios”, segundo o PP, “hai que engadir que tampouco se están cumprindo compromisos de axudas anunciadas, como tampouco se permitiu o desbloqueo dos parques eólicos vinculados con Alcoa que anunciou o señor Gómez Besteiro xa hai dous anos”.
Francisco Conde destaca que o sentir entre os traballadores “é de total impotencia” ao ver como o Goberno central “está a comprimir o futuro da planta e do emprego na Mariña” polo que seguirán demandando no Congreso dos Deputados a reunión inmediata da Mesa de Seguimento para desbloquear a situación.
SITUACIÓN ACTUAL
O PP sinalou que o Goberno do Estado segue sen aplicar as bonificacións ás empresas polas compensacións de CO2 “que non cobren a totalidade dos 917 millóns que as empresas pode chegar a compensar, polo que os 600 millóns que se bonifican na actualidade son claramente insuficientes”.
“A realidade é que o Goberno mantén bloqueados os parques eólicos de Alcoa, que xa tiñan a DIA aprobada, así como a inexistencia de medidas para compensar os custos dos servizos de axuste para reforzar o sistema eléctrico e evitar un segundo apagamento”, denuncia o PP, que critica que tampouco se aprobe un real decreto lei para garantir a bonificación do 80% das peaxes.