O administrador do concurso de acredores da empresa de Foz Pescados Rubén pechou o prazo de presentación de ofertas de compra da pesqueira sen máis propostas que a que xa se propuña no documento do concurso, a de Sart Galicia.

Aínda que houbo unha empresa máis polo menos que visitou as instalacións, non fixo a oferta formal no prazo establecido, polo que será Sart Galicia Pesca, con sede social en Burela e vinculada á sociedade limitada Euroservipesca, a que quede coas instalacións da factoría focense.

Esta tamén anunciou que subrogará a 29 dos 80 traballadores que tiña Pescados Rubén no momento no que entrou en concurso de acredores.

Segundo explicou a secretaria de acción sindical de UGT, Isabel López López, os delegados foron chamados pola empresa concursal a unha reunión o vindeiro luns, 10 de marzo, ás 12.00 horas, para comezar a negociación do expediente de regulación de emprego.

A delegada sindical explicou tamén que a empresa compradora presentara unha lista cos 29 traballadores que ía a subrogar, todos con nomes e apelidos, pero dous deles xa se deron de baixa e están noutro traballo, do mesmo xeito que outro tres que non estaban nesa lista, polo que se reduce o número de traballadores que irán ao ERE.

A finais do pasado ano, Pescados Rubén, que chegou a alcanzar cifras de facturación de 43 millóns de euros, anunciou a retirada do histórico patrocinio do club de fútbol sala de Burela, que ten dous equipos en Primeira División, debido a problemas económicos. Ese foi o principio dun proceso de quebra que culminou coa presentación do concurso de acredores a principios do mes de febreiro.

A empresa, asentada no polígono de Fazouro, xustificou o peche alegando problemas de solvencia debido a unha débeda acumulada con provedores e atraso nas nóminas.

Pescados Rubén, comercializadora de peixe fresco, elaborado e conxelado, que mantiña negocios con 40 países, foi fundada en 1964 polo matrimonio formado por Rubén e Cesarina.