O conselleiro do Mar, Alfonso Villares, reuniuse este martes cos patróns maiores das confrarías da Mariña lucense co obxectivo de abordar as necesidades do sector pesqueiro e falar sobre as actuacións desenvolvidas polo Goberno galego “no deseño e execución de actuacións concretas”.

Ademais, a Xunta detallou nunha nota de prensa que o responsable do Mar destacou a “importancia” de celebrar este tipo de reunións para “reforzar o diálogo e estreitar a colaboración” coa Administración autonómica.

Deste xeito, Villares incidiu en que nos próximos meses está prevista a reparación do porto de carga do Vicedo, o inicio das obras de mellora ou o acondicionamento dos departamentos de armadores do porto de San Cibrao, entre outras accións.

Neste sentido, referiuse tamén á renovación da iluminación no porto de Celeiro e adiantou que a finais de ano iniciarase a obra de urbanización da fachada marítima na contorna da oficina portuaria e os departamentos dos armadores “no que a Xunta investirá 300 mil euros”.

Con todo, o conselleiro tamén informou na súa visita á vila lucense de que tanto a redacción como a licitación do “proxecto de reforzo exterior do dique da dársena norte do porto de Celeiro está pendente do informe de Costas do Estado desde agosto do 2022”.