O comité de Alcoa volveu a pedir a reunión de seguimento pendente, á vez que solicita a Xunta e Goberno que “busquen fórmulas a través da liña ICO ou calquera outro mecanismo que teña dispoñible para que Alcoa comece as obras de investimento para o forno de cocción de ánodos”.

Segundo informa o comité este mércores, demandas ás administracións esta actuación “sen descapitalizar deste xeito o fondo de garantía”, de forma que Alcoa “devolva o diñeiro nos prazos que se acorden coas administracións, sendo unha posibilidade que o faga unha vez superado o período de axuste do 2025-27, que é cando Alcoa conta volver xerar fluxo de caixa”.

Doutra banda, o comité acordou realizar unha mesa redonda con medios aberta a partidos políticos e representantes de Alcoa para abordar a situación actual.

Todo iso despois de que, o pasado 21 de xaneiro, Alcoa, Ignis EQT, Goberno central e Xunta asinasen un “memorándum de entendemento” (MOU polas súas siglas en inglés) para asegurar o futuro a longo prazo da fábrica de San Cibrao, o que inclúe priorizar o rearranque da planta.