O comité de empresa de Alcoa confirmou que, finalmente, a reunión de forma bilateral coa empresa celebrarase o 2 de decembro na fábrica de San Cibrao, no municipio de Cervo.

Nun primeiro momento, Alcoa propuxo unha reunión en Madrid para este mércores, 27 de novembro, cuestión rexeitada polos traballadores, polo que fixou unha nova data para o día 2, luns. Por iso, o comité solicitou que a xunta se realizase nas instalacións da fábrica.

Neste sentido, o comité puntualizou, nun comunicado, que o encontro do próximo luns, entre empresa e traballadores, “nada ten que ver” coas reunións de seguimento do plan de viabilidade.

REUNIÓN DE SEGUIMENTO

Noutra orde de asuntos, o comité de empresa lembrou ao presidente da Xunta, Alfonso Rueda, “o compromiso” de acudir á reunión de seguimento que se celebrará o 9 de decembro en Madrid.

Todo iso, despois de que Rueda, este xoves, se compremetiese a acudir se asisten o ministro de Industria, Jordi Hereu, e a nova ministra para a Transición Ecolóxica, Sara Aagesen.

O comité de empresa incidiu en que, tanto a presenza de Rueda como a dos ministros, “deixaría claro” o posicionamento das Administracións sobre a factoría e “o futuro” da Mariña Lucense.