O comité de Alcoa San Cibrao, no municipio de Cervo, acordou con administracións a creación de mesas técnicas de seguimento para supervisar os avances en futuros parques eólicos e a ampliación da balsa de lodos (DBR).

Segundo informan os representantes dos traballadores nun comunicado, “durante as últimas datas establecéronse contactos co Goberno de España e coa Xunta de Galicia, froito dos cales quedou claro que o interese dos gobernos e o comité é coincidente en manter a actividade do complexo industrial en San Cibrao”.

Todo iso nunha semana na que Alcoa informou de que perde 237 millóns ata marzo e que seguirá adiante coa venda do complexo de San Cibrao, para o que prevé ter ofertas vinculantes en xuño.

Así mesmo, esta semana, o presidente o comité de Alcoa, José Antonio Zan, pediu que “entre a SEPI (Sociedade Estatal de Participacións Industriais)” de accionista, “como está a facer en Telefónica ou Talgo”, de forma que “acompañe ao comprador industrial” e que quede con entre o 20% e o 30% das participacións, o que permitiría ao Goberno ter asento no consello de administración para asegurar que se fan investimentos e se aposta pola viabilidade.