A nova reunión da mesa de seguimento de Alcoa San Cibrao quedou aprazada para despois de Semana Santa, aínda en data por determinar.
O Ministerio de Industria convocara para o 21 de marzo este novo encontro, pero este xoves o comité de empresa informa de que a Secretaría de Estado de Industria trasladou que se debe pospor por “motivos inescusables”.
Recentemente, o Ministerio destacou que “se segue traballando con empresa e traballadores para abordar alternativas, demostrando o seu compromiso cun sector estratéxico como o aluminio en Galicia e España”.
Hai uns días, o presidente do comité de Alcoa, José Antonio Zan, criticou que este encontro entre administracións, empresa e representantes dos traballadores leva semanas de atraso desde a data comprometida da que será a décimo sétima reunión de seguimento.
Así mesmo, Zan recriminaba que “Alcoa cada vez manda unhas mensaxes máis claras de que nin está nin se lle espera, nin conta con estar no futuro”.
Todo iso mentres Alcoa continúa co proceso de rearranque gradual da planta, que levou a que a fábrica volvese a producir aluminio primario despois de dous anos. O acordo asinado cos traballadores pasa por ter 32 cubas a 1 de abril e continuar coa ampliación progresiva ata o pleno funcionamento en outubro de 2025.
CONSELLEIRA DE INDUSTRIA
A conselleira de Industria en funcións, María Jesús Lorenzana, apurou ao Goberno a convocar a reunión de seguimento de Alcoa tras quedar aprazada ata despois de Semana Santa, con data aínda por determinar.
“Reiteramos a solicitude e urxencia, é de moita urxencia tendo en conta que desde o mes de xaneiro que estaba comprometida, e van dous meses, é necesario concretar o plan de viabilidade e o plan de negocio”, manifestou a conselleira de Industria, María Jesús Lorenzana.
Así, defendeu a urxencia destas concrecións para coñecer o “destino da empresa e, sobre todo, dos traballadores e familias afectadas”.
“Reclamamos unha vez máis, con dous meses de atraso, que o Ministerio de Industria convoque de forma inmediata a mesa de seguimento de Alcoa”, incidiu a conselleira en funcións.