O Club Baloncesto Breogán, que no vindeiro curso militará de novo na Liga ACB, a máxima categoría do básket español, desprazarase este sábado ata Viveiro, onde continuará co seu plan de pretempada.

A expedición do equipo lucense aloxarase nun hotel da localidade e será recibida no consistorio viveirense. No seu programa na Mariña, o club inclúe dous adestramentos en San Cibrao (sábado e domingo pola mañá), no concello de Cervo, outro na cidade do Landro, un traballo de recuperación en piscina e SPA e traballo físico e de recuperación nunha das praias da contorna.

O CB Breogán agradeceu aos Concellos de Cervo e Viveiro a súa hospitalidade e a cesión das instalacións deportivas.