A AD Santiago de Foz proclamouse campión da Copa Deputación alevín, nunha final con protagonismo mariñao, xa que os focegos medíronse no partido decisivo polo título ao Viveiro A. 

O encontro, que se desputou no campo da Ribela, en Sarria, foi igualado e os pupilos de Criss estiveron máis atinados na quenda de penaltis, despois de chegar ao final do partido con 1-1. Os focegos gañaron o campionato logo dun gran torneo e os viveirenses alcanzaron un meritorio subcampionato que fala da boa saúde da canteira mariñá.

O deputado de deportes, Pablo Rivera Capón, e a alcaldesa de Sarria, Pilar López Yáñez, entregaron os premios do torneo alevín e tamén do benxamín, no que o Lugo A derrotou ao Lugo B. 

TERCEIRO CAMPIÓN DA BISBARRA

O cadro focego é o terceiro equipo da bisbarra que levanta o trofeo nesta edición, despois do triunfo da SD Ribadeo nas competicións infantil e xuvenil. A SD Burela, que desputa a final do trofeo de Segunda e Terceira Autonómicas este domingo no Anxo Carro ante o Brollón, podería completar o póker.