O piragüista formado en Viveiro Cristian Toro proclamouse campión de Europa nas categorías de K4 500 e K2 200 no Europeo de piragüismo que se celebrou esta semana en Belgrado.
Pola mañá, o K4 500 español, que integraron Toro, Saúl Craviotto, Marcus Copper Walz e Rodrigo Germade, tamén galego, levou o título da especialidade cun tempo de 1:18.559, mentres que o conxunto xermano – completou o percorrido en 1:18.573. Catorce milésimas decidiron os gañadores e o final da competición foi tan axustado que a vista provisional deu o título a Alemaña, e houbo que revisar o resultado no control de carreira.
Pola tarde, Toro e Craviotto, campións olímpicos de K2 200 en Río de Xaneiro 2016, impuxeron a súa velocidade nesta categoría cun tempo de 00:31.250, por diante do dúo serbio formado por Nebojsa Grujic e Marko Novakovic. Os húngaros Mark Balaska e Balazs Birkas subiron ao podio ao acadar a terceira praza.
FORMADO EN VIVEIRO E LUGO
Nacido en Venezuela no 1992, Toro chegou a España cando era un neno e iniciouse no piragüismo en Viveiro. Axiña destacou nas filas do Club Piragüismo Viveiro e deu o salto ao Club Fluvial de Lugo, que lle permitiu competir en regatas nacionais e posteriormente internacionais.