O Pescados Rubén Burela FSF remontou un 0-2 e demostrou a súa mestría no xogo de cinco -faceta no que é sen dúbida o mellor equipo da Primeira División- para derrotar ao Jimbée Roldán, o vixente campión de Liga, e coarse na final da Copa de España de Cádiz. O Atlético, que demostrou a súa calidade fronte ao Universidad de Alicante (6-1), será o rival das burelesas no partido polo título, mañá ás 11.00.
TEMPERÁN GOL DAS MURCIANAS
A primeira metade estivo marcada polo temperán gol de Consu, no minuto 4. A internacional española, que completou un enorme encontro, aproveitou unha mala saída do balón do Burela. Levou por loita varios rexeitamentos antes de facer unha parede con Miriam e bater a Ana Romero. O tanto deu ás ao Jimbée Roldán e pouco despois Vanesa Pereira conectou un disparo que desbaratou a gardameta murciana do Pescados Rubén. De aí ao remate do primeiro asalto, os esforzos para nivelar o marcador das discípulas de Julio Delgado e máis Lucas foron infrutuosos.
VARIAS LESIÓNS
Nun segundo tempo bronco, no que se lesionaron Vanesa Pereira, Mari Ángeles e tamén Sara Correia -a priori cun esguince de xeonllo-, as cousas torcéronse aínda máis para as mariñás. No minuto 30 Jozi resolveu con mestría un man a man contra Consu que foi o preludio do 2-0, no que a goleadora do Jimbée Roldán culminou un gran contraataque das campioas de Liga.
SARA CORREIA MARCHOU MANCADA CUN ESGUINCE DE XEONLLO
A PORTEIRA-XOGADORA, CHAVE
Julio Delgado e máis Lucas non agardaron un segundo e o cadro burelés sacou a porteira-xogadora. A sete minutos para o remate, Bea Mateos aproveitou un contragolpe en tres toques das mariñás para levar a incerteza ao marcador. Ao pouco, Etayo despexou un disparo de Cilene. A gardameta do Roldán non puido con Dany, que fixo boa unha excelente circulación de balón das súas e equilibrou a balanza. Foron os mellores minutos do cadro laranxa e, acto seguido, Tai Menezes perdoou o 3-2 nunha ocasión inmellorable, ao rematar ao longueiro case sobre a liña de gol logo dun fungueirazo de Cilene.
DANY DECIDE NA PRÓRROGA
A dous minutos para o remate da segunda parte do tempo extra, de novo co xogo de cinco, Dany puxo por diante ao Pescados Rubén cun gran disparo e levou ao Pescados Rubén á final da Copa. O encontro decisivo poderase ver en directo na canle de Youtube de ONDACADIZTV.