InicioCulturaAntía Yáñez: "Nas novelas que lin as mulleres tiñan un rol auxiliar"

Antía Yáñez: “Nas novelas que lin as mulleres tiñan un rol auxiliar”

A escritora burelesa gañou o premio Illa Nova coa novela 'Senlleiras', que sairá en breve

Publicada o

- Advertisement -

Antía Yáñez (Burela, 1991) anda atarefada. É época de exames para os estudantes e ten que multiplicarse na academia onde traballa, en Cecebre (Cambre). Cando ten un rato libre falamos con esta rapaza mariñá sobre a súa carreira como escritora. A súa novela ‘Senlleiras‘ gañou o premio Illa Nova de narrativa no pasado mes de abril e a editorial Galaxia está a piques de publicala. Nela aborda a violencia machista ao longo da historia.

O xurado decidiu por unanimidade: as protagonistas de ‘Senlleiras’ “son mulleres das que non se olvidan”. Vaia piropo, eh?

Gustoume moito que me dixeran iso. Son da idea de que máis ou menos todo está escrito, de que todos os grandes temas están xa na historia da literatura. Así que o que cambia é o enfoque, o estilo que teñas e as personaxes que sexas capaz de crear.

Non abundan as mulleres protagonistas na literatura, menos escritas por mulleres.

Nas novelas que lía de nena as mulleres sempre tiñan un rol auxiliar. E eu quería ser moitas cousas de pequena, astronauta, detective… Pero non un neno (risas). Ao final, escribes o que che gustaría ler. Hai uns días unha escritora citou un estudo sobre as veces que saíu a menstruación na literatura. Parece que a regra é un tema tabú.

“”senlleiras’ é a historia dunha influencer que se ve envolta nun misterio”

Cal é a trama de ‘Senlleiras’?

Comeza cunha ‘influencer’ que se fai unha fotografía e nela aparece unha man pantasma. Gústame moito o misterio, o terror. A partir de aí mesturo na novela o presente e mailo pasado.

Antes xa publicara ‘O Misterio de Portomarín’, unha novela xuvenil.

Si. Estou moi contenta porque vai pola cuarta edición e chegou a estar en oitava posición do ránking de libros máis vendidos de Galaxia.

Foi un reto pasar a dirixirse a un público adulto?

Todo ten a súa complicación. Cos nenos tés que adaptar a linguaxe, tentar divertir e ensinar sen que se decaten. E céntraste nun tema ou dous, como moito, mentres que cando escribes para adultos as tramas son máis transversais, tés que profundizar e crear personaxes máis completos. ‘Senlleiras’ levoume, máis ou menos, o que un embarazo, uns nove meses. Fixen un traballo de documentación bastante exhaustivo sobre a ditadura de Primo de Rivera, sobre os xornais daquela época.

“o trato que se dá na prensa aos feminicidios non dista tanto de hai cen anos”

E con que se atopou?

Alucinei un pouco, sobre todo co tratamento que se daba aos feminicidios, que non era moi diferente do que se le agora. Falábase de crimes paixonais, por exemplo. Cambiaron moitas cousas desde aquela e outras non tanto. Somos máis visibles, agora traballamos fóra da casa, pero ás veces semella que aínda somos un cero á esquerda.

Ten referentes na escrita?

Non. Gústanme ler cousas moi diferentes, mesmo escritores machistas, co ánimo de rebatilos. A verdade é que non son nada mitómana, non idolatro a ninguén, penso que perdes a perspectiva das cousas.

Abre este premio a porta a unha carreira profesional como escritora?

É pouco probable. Son consciente do reducido que é o mercado galego. Hai xente como María Solar ou Pedro Feijóo que teñen as súas novelas traducidas, pero é complicado. Pero gustaríame, si, gustaríame moito. 

ÚLTIMAS

Morre tamén a nai da falecida no incendio do Valadouro

A muller de 77 anos trasladada ao Hospital da Mariña polas feridas sufridas no incendio...

ACISA Ribadeo anima ás empresas locais a unirse ao Bono Activa Comercio

Acisa anima ás empresas locais a adherirse ao Bono Activa Comercio da Xunta....

A CAMOVI de Viveiro será unha homenaxe a Ramón Blanco na edición deste ano

O Concello de Viveiro será esta próxima fin de semana o escenario dunha nova...

O sábado 20 de abril comeza a XVII Edición de Ribadeo de Tapeo

Este sábado, 20 de abril, dará comezo o XVII Ribadeo de Tapeo, un dos...