A asociación veciñal de Santa Comba da Órrea, en Riotorto, presentará o vindeiro domingo o libro ‘Segadores da Órrea en Castela, unha historia de heroes’, unha obra que reconstrúe a historia dos emigrantes desta parroquia riotortense que foron traballar en Castela, na sega estival de todo tipo de cereais e leguminosas. Será no local social parroquial, a partir das 11.30 horas.

O fenómeno migratorio cara as terras de Castela desde zonas como Valdeorras, O Bolo e Trives, na provincia de Ourense, e A Terra de Miranda e A Terra Cha foi constante durante tres séculos, desde o XVII ata mediados do XX. Na parroquia de Santa Comba da Órrea, esta migración estacional tivo moita incidencia, dada a súa elevada poboación e escasa disposición de terras de labranza. De aí que moitos adolescentes e homes formasen “cuadrillas” -de nove homes na maior parte dos casos- que ano tras ano, primeiro a pé no mes de maio e logo en ferrocarril no mes de xuño, marchaban para traballar na sega, unha situación que se repetiu ata a década dos 60 da pasada centuria.

as migracións estivais cara castela duraron 300 anos

A presenza dunha decena de segadores convertirá a presentación nun verdadeiro acto de memoria histórica, capaz de tender pontes entre as xeracións máis novas e máis vellas do lugar.

Na presentación estarán, por suposto, o autor da investigación, Carlos Veiga; Eliseu Fernández, fillo de afiador e estudoso do tema; Anxo Villada, da Asociación para a Promoción Social dos Ferreiros de Riotorto; Manolo Pardo, presidente da Asociación de Amigos da Malla de Meira; Alberto Fernández, segador; a veciña da parroquia Mariluz Iglesias, presentadora do acto e estudosa tamén do fenómeno migratorio; e Toño Abraira, presidente de agrupación que publicou o estudo.

DOCUMENTAL

O colectivo organizador informa tamén de que ten previsto completar a investigación escrita cun documental realizado en colaboración coa Fundación TIC lucense.