O Resurrection Fest volveu demostrar poder de convocatoria. Segundo asegurou a organización, a décimo terceira edición do festival -con catro días de concertos– congregou a 81.352 asistentes, unha cifra inferior á de 2017, cando se achegaron a Celeiro 86.475 seguidores, pero superior á do 2016, que reuniu a 80.542 persoas. Este 2018 foi, polo tanto, o segundo ano que máis fans seduciu.

A organización resalta que pasaron polo festival persoas de 42 países diferentes e que se completou aforo na última xornada, na que os asistentes poideron desfrutar de bandas como Exodus, Prophets Of Rage ou Kiss.

KISS E O SEU ‘EXÉRCITO’

Na última xornada, Kiss ofreceu ao seu ‘exército’ a súa concepción festiva do rock nun concerto non que non faltaron ‘I Was Made For Loving You‘ ou ‘I Wanna Rock N Roll All Night‘, nin os voos rasantes de Paul Stanley nin a quilométrica lingua de Gene Simmons. Tamén soaron, cunha nitidez impecable, clásicos como ‘Detroit City Rock‘ ou ‘Black Diamond‘.

Prophets Of Rage puxeron á xente a botar, e malia algún lapsus -“Grazas Barcelona”- gañaron ao público con ‘Killing In The Name‘, a peza máis célebre de Rage Against The Machine, a outra banda do guitarrista Tom Morello. Exodus levantaron a noite despois do remate dos dous cabezas de cartel do festival e para algúns foron o mellor da derradeira xornada.