Como cada venres, o Xornal da Mariña repasa a axenda cultural e de ocio da fin de semana.
BURELA
Carlos Blanco e Xosé Touriñán presentarán en Burela, venres e sábado, o seu novo espectáculo, ‘Unha noite na praia’. Ambas as sesións serán ás 21.30 horas, cun prezo de 15 euros. Aquí podes ler a sinopse da obra.
A Feira do Libro de Burela cumpre o seu terceiro ano reunindo oito librarías. Os horarios de apertura das casetas será de 12.00 a 14.00 horas polas mañás e de 18.00 a 21.30 horas polas tardes. Neste enlace podes consultar o programa completo.
CERVO
O Coro da Mariña actuará no café bar cultural A Sacabeira, de Sargadelos, o sábado a partir das oito da tarde.
FOZ
Foz prepárase para unha nova edición da Festa Normanda. A presentadora de televisión Belinda Washington ofrecerá o pregón (venres, 21.00, área do Bispo Santo) dun evento que terá o seu momento central o sábado ás 14.00, co desembarco normando na praia de Tupide, onde San Gonzalo tentará obrar a milagre.
OUROL
Os Aturuxeiros de Bravos convidan o sábado á terceira edición da súa Malla Tradicional, que este ano contará ademais cunha ruta cabalar.
RIBADEO
O xornalista ribadense Fabián Pérez dará o pregón das festas patronais de Ribadeo, o sábado (20.30 horas, teatro). Podes consultar aquí o programa.
O Mercado dos Domingos de Ribadeo réndese esta semana ao tomate cun obradoiro e unha degustación, ademais de música.
VEGADEO
Eco21 Vegadeo cumpre o sábado e o domingo 16 anos como mostra de agricultura ecolóxica dos Oscos-Eo. Trinta expositores participarán na feira.
VIVEIRO
Arrincan os ‘Sábados de contos‘ en Viveiro (biblioteca municipal, 12.00 horas) coa actuación de Caxoto.
XOVE
O pregón de Xacio Baño, o pasado xoves, deu inicio as festas patronais de Xove, na honra de San Bartolo.
O programa inclúe a actuación de orquestras como a Panorama, actividades infantís e unha sardiñada.