O Tentacle Summer de Foz anunciou o cartel completo da vindeira edición -a sétima- do festival de música disco, electrónica e house, que se celebrará o vindeiro 27 de xullo. Chez Damier (Chicago), Secretsundaze (Londres) e Baldo (Barcelona) encabezarán a nómina de artistas.
O asturiano Paul Rudder; o dúo Aparato, procedente de Santiago de Compostela, formado por Chus Silva e María Caramés; Meraki, parella composta por Óscar Mosqueira e Froilán Fernández; Moisés López ‘Cohen’, responsable dos Xoves Cálidos do Muelle Bar; Alex Nite; Manuel Vilouta e Vitor P. son as novas incorporacións do festival.
CELEBRARASE NAS ‘TORRES’
O Tentacle Summer celebrarase nas Torres, onde se ubicará unha zona urban, que disporá das novas instalacións deportivas da urbanización. A organización baralla realizar actividades de deporte e cultura urbá, ademais dun campeonato de skate e outro de baloncesto 3×3.
Esta zona estará amenizada cos Djs da Tentacle Summer Crew & Friends. Finalmente, haberá unha zona de comida con polbo e churrasco e outra de mercado.