A xunta de voceiros do Concello de Ribadeo acordou que a corporación municipal sumarase á homenaxe a Luís Trigo Chao, o Gardarríos, e Antonia Díaz Pérez, loitadores antifascistas, con motivo do 70 aniversario do seu asasinato. O evento conmemorativo será o 23 de xuño, con actos en Mondoñedo e Lourenzá.

PERFIL DE DÍAZ

Díaz Pérez, que foi abatida xunto co seu compañeiro con só vinte anos, era natural de Vilela, en Cubelas, e residía no lugar de Reverte, na parroquia de Piñeira. Naceu o 12 de xuño do 1928 e axiña quedou orfa de nai. Traballou de nena como labrega, xornaleira e pastora de gando.

NA CLANDESTINIDADE DESDE OS 18 ANOS

Trala detención do seu irmán Fidel por colaborar nas actividades de oposición, Antonia pasou á clandestinidade, con 18 anos. Foi asasinada en Vilanova de Lourenzá o 25 de xuño do 1948 xunto ao seu compañeiro sentimental, o Gardarríos. O seu corpo foi enterrado nun baldío do cemiterio da vila. 

A corporación quere honrar a memoria da súa veciña e convida aos ribadenses a que se sumen á homenaxe.