As entradas para o concerto de Blas Cantó nas feiras e festas das Quendas, o 30 de abril, poderanse adquirir desde esta tarde.

As localidades estarán dispoñibles, a partir das 16.00 horas, no seguinte enlace da plataforma Woutick. O custo das entradas é de 22 euros máis gastos de xestión.

O coñecido artista murciano ofrecerá un concerto en acústico (auditorio Pascual Veiga, 22.00 horas) dentro da programación da Quendas.

Organizados pola Asociación As San Lucas en colaboración co Concello, os festexos celebraranse este ano entre o 29 de abril e o 1 de maio. O concerto será o 30 de abril, ás 22:00 horas.

Trala súa participación na boy band Auryn, coa que se converteu nun superventas tanto en España como en Latinoamérica, Cantó gañou a quinta edición do concurso televisivo ‘Tu cara me suena‘.

O vocalista murciano obtivo discos de ouro e platino con ‘El no soy yo‘ e no pasado mes de setembro publicou o álbum de estudo ‘Complicado‘, o seu primeiro LP como solista.

“PROMOCIÓN DA CIDADE”

O presidente da agrupación organizadora, Miguel Souto, cre que o recital será “un bo medio de promoción da nosa cidade, xa que o turismo é un dos activos de Mondoñedo e así as San Lucas e As Quendas son fundamentais para a economía da nosa cidade”.