-Como afronta Mondoñedo a celebración do Correlingua este 2025 na Mariña?
Mondoñedo acolleu o Correlingua en 2018 e o certo é que temos traxecto andado pois o percorrido é o mesmo. Estamos preocupados por se chove pois algúns puntos do percorrido serían moi esvaradizos, iso obrigaríanos a cambiar eses puntos dentro do itinerario. Ademais diso, xa temos todo planificado incluíndo a sinaléctica dos cruzamentos pensando nos máis pequenos, que non se perdan. Tivemos varias reunións con Paula Alvite, a encargada deste Correlingua, e por outra parte, ademais de todos os voluntarios que traballan para o Concello de Mondoñedo tamén vai participar un ciclo de FP de Animación Sociocultural de Ribadeo.
-Describe como será ese percorrido, os lugares por onde pasará.
Os rapaces chegarán desde o aparcadoiro para os autobuses no Campo dos Paxariños, a saída sería na Alameda, baixaría pola a Avenida das San Lucas e logo farían un percorrido arredor do casco histórico para acabar na Praza da Catedral.
-Como se organiza a seguridade deste Correlingua?
Temos un convenio con Cruz Vermella para actividades deportivas, así pois serán eles os que se trasladen a Mondoñedo para traer unha ambulancia se fose necesario, aínda así, temos perto o PAC. Todo isto estará coordinado co voluntariado para que, se pasa algo, os servizos de emerxencias cheguen o antes posible.
-Nestes momentos, cantos participantes tedes inscritos?
Agora temos uns oitocentos noventa e seis participantes, quedaba por confirmar unha aula mais o que serían nenos temos arredor de novecentos nenos. Dicir que participan case todos os colexios da comarca con algunha aula.
-Dentro deste Correlingua cales serían as principais actividades nas que poden participar nenos e nenas á parte da propia carreira?
Os máis pequenos quedarán na praza da Catedral onde estaría Frank Rey, quen faría de mestre de cerimonias, haberá actuacións como a da Mecánica Rolling Band para os maiores e tamén actividades levadas adiante por Paco Nogueiras para os máis pequenos.
-Mondoñedo é cuna de ilustres autores en galego: Cunqueiro, Leiras Pulpeiro e músicos como Pascual Veiga. Vaise facer algunha actividade en relación a estes creadores?
O Correlingua está pensado para pasar por todos aqueles puntos de referencia como son Leiras Pulpeiro, por diante do Seminario onde estudaron outros autores das nosas letras e diante da Casa de Cunqueiro e Noriega Varela. Por tanto, os nenos poderán ver lugares distintivos relacionados con estes persoeiros. Tamén buscamos que os nenos coñezan o que aconteceu no noso concello observando lugares destacados.
-Á parte de todos estes actos, haberá algunha sorpresa para todos os mozos e mozas que se xunten ese día en Mondoñedo?
Non, máis que nada porque sería complicado e porque buscamos que todo vaia encaixado, mais deixaremos libre a improvisación da rapazada. Con todo, esperamos ter todo ben sincronizado todo o posible porque son moitos nenos.
-Fóra do Correlingua, celebrades o resto dos anos actividades parecidas?
O Día das Letras Galegas vinculámolo moito aos nosos escritores e sempre programamos actividades na Casa Museo de Álvaro Cunqueiro, para dar a coñecer a figura a quen se lle dedique o Día ese ano. Así, preparamos actividades para nenos e outras para os adultos.