A banda británica Judas Priest actuará no Resurrection Fest de 2025, en Viveiro, onde celebrará os 35 anos do disco ‘Painkiller’, publicado en 1990.

Tras o seu paso por Viveiro hai tres anos coa súa xira ’50 heavy metal years’, Judas Priest presentarán o próximo ano o seu recente traballo de estudo ‘Invincible Shield’, dentro da xira ‘The Shield of Pain Tour’.

Ademais de celebrar o 35 aniversario dun dos mellores traballos da banda, “tampouco poderá faltar en directo unha gran parte dos himnos da banda, así que os fans do heavy metal non poderán perder esta cita”.

Deste xeito, unha das principais bandas de heavy a nivel mundial súmase aos tamén xa confirmados Slipknot, outro dos grandes nomes da próxima edición. O Resurrection celebrarase do 25 ao 28 de xuño de 2025.