O musical ‘We love Queen’, que homenaxea e teatraliza a música da lendaria banda de rock británica, será un dos reclamos da terceira edición do Festival Interrexional Eu Son Eo, que organizan de forma conxunta os concellos de Trabada e Vegadeo. O evento será en Abres os días 29 e 30 de xuño.
A vicepresidenta e voceira da comisión organizadora do evento, Hortensia Araújo, conduciu a presentación do evento, á que acudiron o alcalde vegadense, César Álvarez, e a rexedora de Trabada, Mayra García. Araújo sinalou que o musical sobre Queen é un espectáculo “cargado de enerxía e de cor” que “soará espectacular á beira do río Eo”.
unha das novidades do programa será un monólogo
Outra das actuacións estelares será a o grupo pucelano Cañoneros, que interpreta cancións da década dos 80. Ademais, varios Djs da zona animarán a festa con pezas para todos os públicos. “Este é un festival pouco común, no que poden participar desde nenos ata maiores”, sinala Araújo.
O programa inclúe un monólogo, actividades acuáticas, exposicións e charlas, e tamén unha feira artesanal na que participará xente da zona. Friedrich, o ferreiro do Mazonovo, de Santa Eulalia de Oscos, ofrecerá un obradoiro do seu oficio. E tamén haberá unha carreira popular.
Todas as actividades do Eu Son Eo, incluídas as actuacións musicais, son de balde.