A Asociación Sociocultural A Pomba do Arco impulsa mañá, ás 20.30 horas no centro social A Saira de Nois, unha conferencia do estudoso local Antonio Sixto sobre ‘A propiedade da terra en Nois‘. O presidente da agrupación, Xosé Ramón Fernández Pacios, presentará o evento.

Sixto fará un percorrido polo réxime de propiedade na parroquia dende o século XV ata a actualidade. O investigador tamén analizará a función tradicional do monte, en comparanza co seu papel na actualidade, e explicará con cartografía a orixe das diversas parcelas ata chegar aos seus donos actuais. Así, os presentes poderán coñecer como se artellou o núcleo de poboación de Nois en función das necesidades da produción agraria. “Un caso significativo é o emprazamento tradicional das vivendas, situadas á beira do camiño e no espazo onde a terra era menos produtivo”, indica o estudoso.

o relatorio percorrerá desde o século xv á actualidade

Ao final da charla, os asistentes serán conscientes dos “esforzos que tiveron que facer os veciños e veciñas de Nois para acceder á propiedade da terra, moitos dos cales tiveron que emigrar para redimir os foros das parcelas nas que traballaban”, indica o conferenciante.

O SÁBADO, ACTIVIDADE PARA NENOS

O sábado 26, desde ás 12.00 horas en fronte ao Cenima, A Pomba do Arco impulsa -en colaboración coa Mesa Pola Normalización Lingüística– unha actividade para nenos. Os pequenos pintarán un póster xigante realizado por Miguel Cuba Taboada, que representa a referentes do mundo das letras, como Rosalía de Castro, Xosé Neira Vilas, María Victoria Moreno, Manuel María ou Begoña Caamaño. Os escritores da bisbarra tamén terán presenza, coa figura de Álvaro Cunqueiro ou de Antón Vilar Ponte.