O Concello de Mondoñedo chega a un acordo con SomosOcéano para promocionar o seu patrimonio na colección de calcetíns desta marca. A Oficina de Turismo do Concello comezará a vender este mércores vindeiro unha prenda que, desta vez, vén bordada co seu particular retrato da riqueza do territorio mariñán.

Segundo explican dende o consistorio, o Concello asinou un acordo cunha marca de emprendedores locais, SomosOcéano, para sacar adiante estes calcetíns que se venderán na amentada Oficina a 10 euros o par. SomosOcéano leva xa máis de cinco anos ofrecendo moda “atlántica” con calcetíns, camisetas e suadoiros deseñados en Galicia que veñen confeccionados con algodón parcialmente orgánico.

Dende o consistorio destacan a “comodidade” da prenda e gran definición das estampas neles gravadas, xa que se fabrican con máquinas de 200 agullas e, en consecuencia, presentan un alto grao de detalle. O Concello subliña tamén que, como amosa este acordo, “aproveita cada ocasión que se lle presenta para tentar posicionarse como administración colaboradora”.