O senador do PP de Lugo José Manuel Balseiro pedirá este luns na Comisión de Cultura do Senado que o Goberno central lidere e financie, con cargo a fondos estatais, a obra de rehabilitación integral do mosteiro de San Salvador de Vilanova de Lourenzá.

Segundo informaron os populares nun comunicado, a iniciativa inclúe a elaboración e execución dun proxecto de intervención, só ou en concorrencia con outras administracións.

O obxectivo, engadiron, é preservar, protexer e poñer en valor o mosteiro declarado Conxunto Histórico-Artístico en 1974 e que ten a consideración de Ben de Interese Cultural de Galicia na categoría de Monumento.

“O Goberno central debería contribuír nalgunha medida á rehabilitación deste importante elemento do patrimonio cultural”, considerou Balseiro.