A Garda Civil de Lugo detivo ao xerente dun bar de Lourenzá por simular un roubo do diñeiro da caixa rexistradora e da máquina recreativa.

Segundo informou o Instituto Armado, foi o propio home, veciño de Barreiros, o que a pasada semana presentou unha denuncia na que detallaba que fose vítima dun roubo.

O home explicou que “autores descoñecidos” accederon local e levaron todo o diñeiro da máquina recreativa e da caixa rexistradora, así como a cesta de Nadal que o propio local sorteaba entre os seus clientes.

Por mor diso, os axentes iniciaron unha investigación e descartaron que os feitos se producisen nos termos denunciados polo xerente do establecemento.

A Garda Civil puido comprobar que a máquina recreativa funcionou en horas nas que o local estaba pechado ao público, tanto en tramos horarios como durante a xornada de descanso, coincidindo coa data en que hipoteticamente se produciu en roubo.

Ademais, chamou a atención dos axentes que o propio hostaleiro “impedise voluntariamente” que a máquina fose recadada no prazo debido, xa que esa información só podía ser coñecida por el porque o establecemento “carece de empregados”.

Na véspera do suposto roubo, a máquina recreativa estivo apagada durante o horario de apertura do local, o que impediu que clientes ou terceiros puidesen usala.

A persoa detida e as dilixencias policiais foron remitidas ao Xulgado de Primeira Instancia e Instrución de garda de Mondoñedo. O home esta acusado dun delito de roubo e outro de simulacro de delito.