-Cal foi a raíz deste Certame de Teatro Amador en Lourenzá?
Porque aquí en Lourenzá sempre houbo moita afición polo teatro, mesmo houbo grupos propios de aquí. A partir de aí foi como ideamos a proposta do Certame de Teatro Amador de Lourenzá durante un mes para achegar diferentes obras ao público.
-Será pois un mes enteiro para o teatro.
Si, normalmente viñámolo facendo os sábados e domingos do mes de novembro e despois tiñamos a gala de entrega de premios. Esta vez tiñamos a idea de desprazar case todo aos domingos porque é o día en que vén máis xente ao teatro, entón pensamos en apliar a algún domingo de outubro e facelo nos dous meses.
-Esta convocatoria ofrece distincións ou premios ás compañías?
Está o premio á mellor representación, que é o premio principal, cunha dotación de 750€. Despois o resto de premios son trofeos.
-A temática das obras é libre?
Si, a temática é totalmente libre, preferentemente en galego, mesmo teñen chegado grupos do Occidente de Asturias facendo a representación na súa variedade do galego.
-En Lourenzá teñen compañías de afeccionados?
Agora mesmo non hai. Si houbo hai tempo mais ninguén colleu o relevo dos rapaces que o levaban. Normalmente eran xente nova mais tamén había grupos de teatro con xente maior que levaba o Taller de Memoria e antigamente había grupos polas diferentes parroquias.
-De onde viña esa tradición polo teatro?
Creo que viña dos teleclubs, algo tamén moi ligado á música pois tamén había moitos grupos de música.
-Unha vez que chegan as compañías a Lourenzá, estas quedan aí pasar a noite, teñen aloxamento?
Non, non teñen aloxamento senón que veñen e van no día. Mesmo viñeron sempre grupos de Ourense e de Vigo. En tal caso, nós seleccionamos as obras que van vir e para iso xa lles damos 350 euros para gastos de desprazamento e material.
-Explíqueme o nome que leva cada un dos trofeos?
O Trofeo Conde Santo fai mención ao patrón da parroquia de Santa María. Os outros nomes veñen marcados pola toponimia, Lourenzo e Ana, mais tampouco está clara a orixe do topónimo.
-Hai algún gusto especial por algún tipo de representación?
O público gusta das obras cómicas costumistas. O xurado buscamos a calidade da obra, a calidade das actuacións e a posta en escena.