Un veciño da localidade luguesa de Foz aceptou unha condena de dous anos de cárcere por incendiar o piso no que residía para vingarse do seu caseiro. O acordo de conformidade entre as partes foi ratificado na vista oral celebrada este mércores na Audiencia Provincial de Lugo, onde o acusado se enfrontaba a unha petición de Fiscalía de 12 anos de prisión.

Os feitos remóntanse ao ano 2017, cando, no mes de marzo, o propietario da vivenda enviou unha carta certificada ao acusado na que requiría o pago dunha serie de rendas que lle debía e apercibíao dun desafiuzamento no caso de que non as abonase. Segundo o escrito de acusación de Fiscalía, semanas máis tarde, xa en abril, o acusado “movido polo ánimo de vinganza e consciente de que había máis persoas no edificio en plantas superiores á súa vivenda” prendeu lume á roupa de cama da súa habitación.

Cando as chamas se propagaron polo cuarto e o resto do piso, o responsable saíu do inmoble e marchou á terraza dun bar situado fronte ao edificio, onde tomou unha cervexa “tranquilamente” mentres os veciños abandonaban as súas casas ao cheirar o fume que saía da vivenda incendiada.

O avogado da defensa, Roberto Guerra, concretou que o acordo leva a suspensión da aplicación da condena, polo que non suporá o ingreso en prisión do seu cliente. Así, o letrado explicou que o seu defendido acepta o seu responsabilidade por un delito de incendio “pero non co perigo para a integridade das persoas”.

Así mesmo, Guerra sinala que “todos os danos causados á vivenda xa foron resarcidos polo acusado pero faltarían parte dos danos de responsabilidade civil que van ser asumidos tamén por el”. O avogado do procesado precisaba que os danos “resarcidos foron peritados en 9.900 euros e aínda quedan todos os danos respecto dos gastos de asistencia dos bombeiros en 990 euros e outros danos para resarcir ao propietario da vivenda en 2.900 euros”.