Unha persoa perdeu a vida este xoves tras producirse un incendio nunha vivenda situada na avenida do Viveiro, na localidade lucense de Foz.

Segundo informou o 112 Galicia, o suceso produciuse sobre as 22.00 horas, cando varias persoas reportaron un incendio nunha vivenda na zona do barrio de Marzán. Nesta comunicación, os alertantes explicaron que podería haber unha persoa dentro, pero non puideron confirmalo nese momento.

Con esta información, o Centro Integrado de Atención ás Emerxencias solicitou a intervención de Urxencias Sanitarias de Galicia-061, dos corpos de Bombeiros de Barreiros e Viveiro e da Garda Civil. Tamén se informou aos voluntarios de Protección Civil de Foz.

Pouco despois das 23.00 horas, os bombeiros informaron que tiñan o incendio baixo control. Unha vez extinguidas as chamas, localizaron ao falecido no interior. Os servizos sanitarios só puideron confirmar o seu falecemento.