O PP esixe “prazos” para a que consideran unha obra “urxente” polo perigo que supón para a plataforma ferroviaria: a estabilización do noiro á altura da Praia de Arealonga, na parroquia de Nois, en Foz.

Os senadores José Manuel Balseiro e Juan Serrano, e o portavoz do PP de Foz, Javier Castiñeira, informaron nun comunicado de que comprobaron o seu estado despois de producirse un desprendemento no cantil en marzo do 2024 que afectou o paseo marítimo de Cangas.

O Partido Popular de Lugo, a través dos seus representantes no Senado –José Manuel Balseiro, José Manuel Barreiro e Juan Serrano–, interesouse por coñecer desde a Cámara Alta a previsión do Goberno de España á hora de executar actuacións coas que garantir a seguridade do servizo de ferrocarril (FEVE) que, na actualidade, ten que reducir a súa velocidade na zona ante o risco de desprendemento.

Respecto diso, Balseiro apuntou que o Goberno confirma que adxudicaron obras por 1,28 millóns para levar a cabo esta obra e outra para estabilizar noiros en dous tramos entre os apeadeiros de Viveiro e Xove por 819.000 euros. Pero reprobou que “evitan dar prazos” para o final dunha obra que, remarcou, “corre présa”.