Cristina Lagares,

-Por que te decidiches a embarcarte nesta aventura da Libraría Bahía?

Antes disto estiven moitos anos traballando na cociña do Hospital de Burela, vinte e sete anos e xa estaba cansa da rutina, sempre o mesmo. Logo, un día vin que traspasaban a libraría Bahía e como pasaban os meses e o cartaz de traspaso seguía aí, prendeu unha luz e dixen: “como me apetece cambiar de traballo vou probar con isto”.

-Cal era a túa relación coa libraría previamente?

Era cliente.

-Coñecías como era o traballo diario dentro da libraría?

Comecei a traballar con eles en novembro para ir vendo como facer e así estiven até comezos de marzo que collín o traspaso.

-Que che gustaría facer na libraría para darlle o aire que che gustaría a ti?

Ben, a libraría funciona ben tal como foi até o de agora, por iso quero manter esta liña e filosofía de empresa. Quero manter esa forma de prestar un servizo á comunidade, o clube de lectura e traer autores para presentar os libros e que a xente pida ou encargue aqueles exemplares que necesita. Actualmente somos metade libraría e a outra metade é papelería.

-Habilitarase máis espazo físico para as presentacións de libros, para a presenza de artistas, etc.?

O espazo é o que é, mais adaptamos con cadeiras e mesas adaptables para as presentacións e o público.

-Pensaches en chamar algún autor ou autora para facer unha presentación?

Polo de agora non, aínda hai moitas cousas que debo ir arranxando e aínda non pensei nese tipo de actos.

-Que che transmitiu a xente de Foz cando viron a túa iniciativa de levar adiante Bahía?

Recibín comentarios moi positivos, de alento e moitas palabras de ánimo porque están contentos de que a libraría continúe.

-Que consellos ou recomendacións che transmitiron os anteriores propietarios para seguir adiante? Os teus coñecidos e familiares apoiáronte nesta decisión?

Moitos, porque eu viña dun traballo diferente e por iso me formaron durante catro meses. Agradézolles moito as cousas que me aprenderon porque o fixeron de corazón. E por parte de coñecidos e familia recibín moitos apoios.

-Cal é a demanda máis importante dentro da clientela?

Véndese moita literatura infantil, vén moita xente con nenos para buscar libros e iso é moi bo. Eu mesma son moi afeccionada á lectura e por iso me decidín a coller Bahía, porque me gustan moitos os libros.

-De cara ao verán pensaches en facer algo especial?

O verán é tempada alta e teremos moito traballo mais aínda non pesamos en preparar algo.